- ភ្ជាប់ទៅគេហទំព័រដទៃ
- សារអេឡិចត្រូនិច
-
- ថ្ងៃពុធ ទី១៩ ខែមិថុនា ឆ្នាំ២០១៣
ពិធីបិទសន្និបាតបូកសរុបសកម្មភាពការងារឆ្នាំ២០១១ និង លើកទិសដៅការងារវប្បធម៌ និង វិចិត្រសិល្បៈ ឆ្នាំ២០១២
ថ្ងៃព្រហស្បតិ៍ ទី១៦ ខែកុម្ភៈ ឆ្នាំ២០១២
នារសៀល ថ្ងៃទី១៦ ខែកុម្ភៈ ឆ្នាំ២០១២ នាសាលសន្និសីទចតុម្មុខ បានប្រារព្ធពិធី បិទសន្និបាតបូកសរុបសកម្មភាពការងារឆ្នាំ២០១១ និង លើកទិសដៅការងារវប្បធម៌ និង វិចិត្រសិល្បៈ ឆ្នាំ២០១២ ក្រោមអធិបតីភាពដ៏ខ្ពង់ខ្ពស់ លោកជំទាវ ម៉ែន សំអន ឧបនាយករដ្ឋមន្ត្រី ប្រចាំការ និងជារដ្ឋមន្ត្រី ក្រសួងទំនាក់ទំនងជាមួយរដ្ឋសភា និង ព្រឹទ្ធសភា និង អធិការកិច្ច តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ហ៊ឹម ឆែម រដ្ឋមន្ត្រី ក្រសួងវប្បធម៌ និង វិចិត្រសិល្បៈ បានរាយការណ៍ជូន អង្គពិធីជ្រាប ថា៖ ក្នុងរយៈពេលពីរថ្ងៃកន្លះកន្លងមកនេះ អង្គសន្និបាតបានបូកសរុបពីលទ្ធផល នៃការអនុវត្តផែនការ សកម្មភាព ការងារវប្បធម៌ និង វិចិត្រសិល្បៈ ឆ្នាំ២០១១ រយៈពេលមួយឆ្នាំកន្លងមកនេះ បានពិនិត្យ និង វាយតម្លៃលើការអនុវត្តផែនការសកម្មភាពប្រចាំឆ្នាំ២០១១ ឃើញថាលទ្ធផលទទួលបាន ចំនួន ៩៥ ផែនការសកម្មភាព លើ១១៩ ផែនការសកម្មភាព ស្មើនឹង៨០ភាគរយ។ តួលេខនេះបញ្ជាក់ថា គ្រប់អង្គភាពចំណុះ ក្រសួង បានខិតខំប្រឹងប្រែងធ្វើឲ្យសម្រេចបានតាមទិសដៅការងារដែលបានកំណត់គួរឲ្យកត់សម្គាល់ ព្រមទាំងបានបង្កើនកិច្ចសហការជាមួយក្រសួង ស្ថាប័នពាក់ព័ន្ធ ដៃគូអភិវឌ្ឍជាតិ អន្តរជាតិ ឯកជន ស្របតាមគោលនយោបាយកំណែទម្រង់រដ្ឋបាលសាធារណៈរបស់រាជរដ្ឋាភិបាលគឺ «រដ្ឋគាំទ្រ ដៃគូឯកជនជាអ្នកអនុវត្ត» ដោយអនុលោមតាមគោលនយោបាយវប្បធម៌ «អភិរក្ស និង អភិវឌ្ឍវប្បធម៌ជាតិ» សំដៅធ្វើឲ្យ «វប្បធម៌ក្លាយជាថាមពលសម្រាប់ការអភិវឌ្ឍន៍សេដ្ឋកិច្ចជាតិ»។
ដើម្បីអនុវត្តឲ្យបានជោគជ័យស្របតាមកម្មវិធីនយោបាយ និង យុទ្ធសាស្ត្រចតុកោណ ដំណាក់កាលទី២ របស់រាជរដ្ឋាភិបាល នីតិកាលទី៤ នៃរដ្ឋសភា ទើបអង្គសន្និបាត ក្រសួងវប្បធម៌ និង វិចិត្រសិល្បៈ បានលើកយកផែនការអាទិភាពចំនួនប្រាំរួមមាន៖
-ជម្រុញឲ្យកម្ពុជា ជាមជ្ឈមណ្ឌលផ្សព្វផ្សាយសិល្បៈទស្សនីយភាព
-ប្រែក្លាយកម្ពុជា ជាដែនដីថតភាពយន្ត
-ប្រែក្លាយកម្ពុជា ជាទីកន្លែងផ្សព្វផ្សាយផលិតផលវប្បធម៌ សិល្បៈសូនរូប និង សិល្បៈសិប្បកម្ម
-ថែរក្សា ការពារ អភិវឌ្ឍតំបន់បេតិកភណ្ឌ ដើម្បីអភិវឌ្ឍសេដ្ឋកិច្ចជាតិ
-ពង្រឹងពង្រីកសមត្ថភាពស្ថាប័ន ភាពជាដៃគូអភិវឌ្ឍ បង្កើតប្រសិទ្ធភាពការងារ និងសេវាកម្ម ដើម្បីអនុវត្តន៍ និង បន្តអនុវត្តន៍សម្រាប់ទិសដៅការងារឆ្នាំ២០១២ នេះ ដើម្បីឈានទៅសម្រេចឲ្យបាននូវគោលដៅ «កម្ពុជា៖ ព្រះរាជាណាចក្រនៃវប្បធម៌» ប្រកបដោយជោគជ័យ និងមានប្រសិទ្ធភាពខ្ពស់ ក្រសួងវប្បធម៌ និង វិចិត្រសិល្បៈ បានយកចិត្តទុកដាក់ធ្វើឲ្យវប្បធម៌មាន សុវត្ថិភាព និរន្តភាព សុខដុមភាព និង វឌ្ឍនភាព។
ក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោកជំទាវ ម៉ែន សំអន សូមសម្តែងនូវការកោតសរសើរ និង វាតម្លៃខ្ពស់ចំពោះ ឯកឧត្តម លោកជំទាវ លោក លោកស្រី ជាពិសេស សិល្បករចាស់ទុំជាព្រឹទ្ធាចារ្យ និងជាវារៈសិល្បករ និងមន្ត្រីវប្បធម៌គ្រប់លំដាប់ថ្នាក់ នៃក្រសួងវប្បធម៌ និង វិចិត្រសិល្បៈ ដែលបានប្រឹងប្រែងអស់កម្លាំងកាយចិត្តយកចិត្តទុកដាក់ក្នុងការបំពេញភារកិច្ចប្រកបដោយស្មារតី ទទួលខុសត្រូវខ្ពស់ និងទទួលបានលទ្ធផលគួរជាទីមោទនៈដើម្បីបុព្វហេតុវប្បធម៌។ រាជរដ្ឋាភិបាល ពិតជាមានការទទួលស្គាល់ថា រយៈកាលកន្លងមក ឯកឧត្តម លោកជំទាវ លោក លោកស្រី បានខិតខំប្រឹងប្រែង អនុវត្តតាមគោលនយោបាយវប្បធម៌របស់រាជរដ្ឋាភិបាលក្នុងការអភិរក្ស និងអភិវឌ្ឍវប្បធម៌ខ្មែរ ពោលគឺ៖ «អភិវឌ្ឍន៍ លើមូលដ្ឋានអភិរក្ស និង អភិរក្សដើម្បីការអភិវឌ្ឍប្រកបដោយ ចីរភាព» សំដៅប្រែក្លាយវិស័យវប្បធម៌ទៅជាកតាលីករចាំបាច់មួយក្នុងការរួមចំណែកកិច្ចអភិវឌ្ឍសេដ្ឋកិច្ច និងសង្គមកម្ពុជា។
ក្នុងនាមរាជរដ្ឋាភិបាល លោកជំទាវ ឧបនាយករដ្ឋមន្ត្រីប្រចាំការ សូមផ្តល់អនុសាសន៍មួយចំនួនដល់ក្រសួវប្បធម៌ និង វិចិត្រសិល្បៈ គឺត្រូវបន្តផ្តោតការយកចិត្តទុកដាក់លើសកម្មភាពមួយចំនួនដូចតទៅ៖
ទី១៖ បន្តជម្រុញការបណ្តុះបណ្តាល និង អភិវឌ្ឍសមត្ថភាពធនធានមនុស្ស ដោយបន្តយកចិត្តទុកដាក់ក្នុងការថែបំប៉ន បណ្តុះបណ្តាលធនធានមនុស្សតាមរយៈការពង្រឹង និងពង្រីកការងារបណ្តុះបណ្តាលនៅក្នុងសាកលវិទ្យាល័យភូមិន្ទវិចិត្រសិល្បៈ សាលាមធ្យមសិក្សាវិចិត្រសិល្បៈ ឲ្យសមស្របទៅតាមតម្រូវការនាពេលបច្ចុប្បន្ន និង ទៅអនាគត។
ទី២៖ បន្តពង្រឹងសកម្មភាពគ្រប់គ្រង ថែរក្សាការពារ និង ទាញយកប្រយោជន៍ពីសក្តានុពលសម្បត្តិវប្បធម៌ នៅទូទាំងប្រទេស តាមរយៈការរៀបចំតំបន់បេតិកភណ្ឌវប្បធម៌ រមណីយដ្ឋានវប្បធម៌ និង ប្រវត្តិសាស្រ្តបន្ថែមទៀត បង្កើនការគ្រប់គ្រង និងថែរក្សាការពារបណ្តារមណីយដ្ឋាន ទូលបុរាណស្ថានីយបុរាណនានាដោយសហការឲ្យបានជិតស្និទ្ធជាមួយក្រសួងស្ថាប័នពាក់ព័ន្ធផ្សេងៗទៀត។ ត្រូវបន្តខិតខំពង្រីករមណីយដ្ឋានវប្បធម៌ ព្រោះថា រមណីយដ្ឋានវប្បធម៌ និងធម្មជាតិ ដែលអាចទាក់ទាញយកផលប្រយោជន៍បានតាមរយៈ ការធ្វើឲ្យមានការចាប់អារម្មណ៍កាន់តែខ្ពស់ថា កម្ពុជា ជាទីកន្លែងថតខ្សែភាពយន្តជាតិ និង អន្តរជាតិ។ ត្រូវបន្តទប់ស្កាត់ការជីកកកាយវត្ថុបុរាណដោយខុសច្បាប់ ក្នុងគោលបំណងថែរក្សាការពារឲ្យបាននូវសម្បត្តិបេតិកភណ្ឌសម្រាប់មនុស្សជាតិទូទៅ។ ពង្រឹងការយកចិត្តទុកដាក់គាំពារ និង ជួសជុលបណ្តាប្រាសាទបុរាណនានា ដែលប្រឈមនឹងការដួលរលំ សំដៅរក្សាឲ្យបាននូវស្នាដៃរបស់បុព្វបុរសក្នុងស្មារតីស្នេហាជាតិ ស្មារតីគោរពដល់ព្រលឹងដូនតា។
ទី៣៖ បន្តបង្កើនការផ្សព្វផ្សាយ ការផលិត និង ការផ្តល់សេវាលើផលិតផលវប្បធម៌ សិល្បៈទស្សនីយភាព សិល្បៈសូនរូប និង សិល្បៈសិប្បកម្ម។
ទី៤៖ បន្តពង្រឹងបទដ្ឋានគតិយុត្តឲ្យមានប្រសិទ្ធភាព និង មានគុណភាពក្នុងការគ្រប់គ្រងសេវាវប្បធម៌តាមរយៈ ការជម្រុញការងារកសាងច្បាប់ និង អនុវត្តច្បាប់ ស្តីពីការគ្រប់គ្រងសម្បត្តិបេតិកភណ្ឌវប្បធម៌ និង ច្បាប់សិទ្ធិអ្នកនិពន្ធ និង សិទ្ធិប្រហាក់ប្រហែល។ បន្តជំរុញកិច្ចសហការជាមួយបណ្តាក្រសួងស្ថាប័នពាក់ព័ន្ធ ដូចជាក្រសួងព័ត៌មាន ក្រសួងទេសចរណ៍ និង កងកម្លាំងប្រដាប់អាវុធគ្រប់ប្រភេទ ក្នុងការផ្សព្វផ្សាយ អប់រំ ដើម្បីទប់ស្កាត់ការជួញដូរវត្ថុបុរាណ និង ការលួចចម្លងស្នាដៃអ្នកនិពន្ធ៕
