- ភ្ជាប់ទៅគេហទំព័រដទៃ
- សារអេឡិចត្រូនិច
-
- ថ្ងៃពុធ ទី១៩ ខែមិថុនា ឆ្នាំ២០១៣
ទិវាវប្បធម៌ជាតិ ៣ មីនា លើកទី១៤ ឆ្នាំ២០១២
ថ្ងៃសៅរ៍ ទី០៣ ខែមីនា ឆ្នាំ២០១២
នៅថ្ងៃទី៣ ខែមីនា ឆ្នាំ២០១២ នៅក្រុងប៉ៃលិន ខេត្តប៉ៃលិន បានប្រារព្ធទិវាវប្បធម៌ជាតិ ៣មីនា លើកទី១៤ ឆ្នាំ២០១២ ក្រោមអធិបតីភាពដ៏ខ្ពង់ខ្ពស់ លោកជំទាវ ម៉ែន សំអន ឧបនាយករដ្ឋមន្ត្រីប្រចាំការ រដ្ឋមន្ត្រី ក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងជា តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវកិត្តិព្រឹទ្ធបណ្ឌិត។ ក្នុងពិធីនោះ មានការអញ្ជើញចូលរួមជាកិត្តិយស ពីលោកជំទាវតំណាងរាស្រ្ត ខេត្តស្វាយរៀង ឯកឧត្តម លោកជំទាវ តំណាងស្ថាប័ននានា លោក ព្យុន ម៉ោងម៉ោង អគ្គនាយកក្រុមហ៊ុនស៊ីណេត តិចណូឡូជី តំណាងសប្បុរសជនជួសជុលចេតីយភ្នំយ៉ាតមកពីប្រទេសមីយ៉ាន់ម៉ា ថ្នាក់ដឹកនាំ និង មន្ត្រីរាជការ ក្រសួងវប្បធម៌ និង វិចិត្រសិល្បៈ កងកម្លាំងខេមរៈភូមិន្ទ កងកម្លាំងនគរបាល ព្រមទាំងថ្នាក់ដឹកនាំ និងមន្ត្រីរាជការ ខេត្តប៉ៃលិន ថ្នាក់ដឹកនាំខេត្តពោធិសាត់ ខេត្តបាត់ដំបង ខេត្តបន្ទាយមានជ័យ យុវជនកាកបាទក្រហម យុវជនកាយរឹទ្ធ ព្រមទាំងសិស្សានុសិស្ស និង ប្រជាពលរដ្ឋខេត្តប៉ៃលិន សរុបមានចំនួនប្រមាណ១០០០នាក់។
ជាកិច្ចចាប់ផ្តើម ឯកឧត្តម អ៊ី ឈាន អភិបាល នៃគណៈអភិបាលខេត្តប៉ៃលិន បានថ្លែងនូវសុន្ទរកថា ស្វាគមន៍ប្រកបដោយភាពកក់ក្តៅបំផុតជូនចំពោះអង្គពិធីទាំងមូល ជាពិសេសជូនចំពោះ លោកជំទាវ ម៉ែន សំអន ឧបនាយករដ្ឋមន្ត្រីប្រចាំការ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និង លោកជំទាវកិត្តិព្រឹទ្ធបណ្ឌិត ព្រមទាំងគណៈកម្មការអន្តរក្រសួងរៀបចំទិវាវប្បធម៌ជាតិ ៣ មីនា ដែលបានសម្រេចជ្រើសរើសយកទឹកដីខេត្តប៉ៃលិន សម្រាប់ការរៀបចំប្រារព្ធទិវាវប្បធម៌ជាតិ ៣ មីនា លើកទី១៤។ ការប្រារព្វពិធីនៅទីនេះ បានបង្ហាញយ៉ាងច្បាស់ពីការយកចិត្តទុកដាក់ និង ការផ្តល់នូវកិត្តិយសដ៏ឧត្តុងឧត្តមបំផុតពីសំណាក់ប្រមុខថ្នាក់ដឹកនាំចំពោះប្រជាជនខេត្តប៉ៃលិន។
ឯកឧត្តម ហ៊ឹម ឆែម រដ្ឋមន្ត្រី ក្រសួងវប្បធម៌ និង វិចិត្រសិល្បៈ បានថ្លែងនូវខ្លឹមសារ និង គោលបំណងនៃការប្រារព្ធទិវាវប្បធម៌ជាតិ ៣ មីនា លើកទី១៤ ឆ្នាំ២០១២ ជម្រាបជូនអង្គពិធីទាំងមូលថា៖ ការរៀបចំទិវាវប្បធម៌ជាតិនេះ គឺក្នុងគោលបំណងដាស់តឿនក្រើនរំលឹកឲ្យយើងទាំងអស់គ្នាបង្កើននូវការយកចិត្តទុកដាក់ថែរក្សា ការពារ និង លើកតម្កើងកេរដំណែលវប្បធម៌គ្រប់រូបភាពឲ្យមាននិរន្តភាព។ ព្រោះថា កេរដំណែលដ៏ថ្លៃថ្លា និង ពិសិដ្ឋទាំងនេះ បើយើងមិនរួមគ្នាយកចិត្តទុកដាក់ថែរក្សា ការពារ ផ្ទេរចំណេះដឹង បន្តវេន និង គ្រប់គ្រងឲ្យមានសុវត្ថិភាពប្រកបដោយនិរន្តភាពទេនោះ វាពិតជាពុំអាចគង់វង្សបានឡើយ។ យោងតាមប្រធានបទនៃទិវាវប្បធម៌ជាតិលើកទី១៤ ឆ្នាំ២០១២ «អ្វីៗទាំងអស់ ដើម្បីនិរន្តភាពវប្បធម៌ជាតិ» ឯកឧត្តម រដ្ឋមន្ត្រី ជម្រាបជូនថា៖ គឺពុំមែនផ្តោតសំដៅតែទៅលើនិរន្តភាពនៃវប្បធម៌អរូបីនោះទេ បេតិកភណ្ឌរូបីក៏ត្រូវតែរក្សាឲ្យមាននិរន្តភាពផងដែរ ពោលគឺត្រូវរួមគ្នាគ្រប់គ្រងថែរក្សា អភិរក្ស គាំពារដល់បណ្តាប្រាសាទដែលកំពុងទទួលរង ឬ ប្រឈមនឹងគ្រោះមហន្តរាយបែកបាក់នៅទូទាំងប្រទេស។ យ៉ាងហោយណាស់ក្នុងដំណាក់កាលដែលសេដ្ឋកិច្ចជាតិ មិនទាន់មានលទ្ធភាពអនុគ្រោះដល់ការជួសជុល ក៏យើងត្រូវយកចិត្តទុកដាក់ក្នុងការគ្រប់គ្រងគាំពារ ទល់ទ្រ ប្រើគ្រប់លទ្ធភាព ដើម្បីកុំឲ្យប្រាសាទដែលទ្រុឌទ្រោមទាំងនោះទទួលរងគ្រោះថ្នាក់ធ្ងន់ធ្ងរដោយខ្វះការយកចិត្តទុកដាក់។
ក្នុងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោកជំទាវ ម៉ែន សំអន ឧបនាយករដ្ឋមន្ត្រីប្រចាំការ មានសេចក្តីសោមនស្សរីករាយក្រៃលែងដោយបានមកចូលរួមក្នុងពិធីប្រារព្វទិវាវប្បធម៌ជាតិ ៣មីនា លើកទី១៤ ឆ្នាំ២០១២ ដែលជាព្រឹត្តិការណ៍ដ៏សំខាន់មួយរបស់ប្រទេសជាតិយើង។ ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ នាយករដ្ឋមន្ត្រី បានធ្វើឲ្យសម្រេចនូវសមិទ្ធផលជាប្រវត្តិសាស្រ្តថ្មីៗថែមទៀត ក្នុងនោះសម្បត្តិវប្បធម៌របស់ជាតិយើងមួយចំនួនត្រូវបានពិភពលោកទទួលស្គាល់ និងបានដាក់បញ្ចូលជាសម្បត្តិបេតិកភណ្ឌពិភពលោក និងជាសម្បត្តិវប្បធម៌អរូបីរបស់មនុស្សជាតិ ហើយសម្បត្តិបេតិកភណ្ឌវប្បធម៌រូបី និង អរូបីមួយចំនួនទៀតក៏យើងកំពុងកសាងឯកសារ ដើម្បីស្នើសុំដាក់បញ្ចូលជាបេតិកភណ្ឌពិភពលោកផងដែរ។ មិនតែប៉ុណ្ណោះ រាជរដ្ឋាភិបាលតែងយកចិត្តទុកដាក់ និង ផ្តល់អទិភាពខ្ពស់ដល់ការអភិរក្ស ការពារ និង លើកតម្លៃវប្បធម៌ជាតិ ស្របតាមគោលនយោបាយវប្បធម៌របស់រាជរដ្ឋាភិបាលពោលគឺ៖ «អភិរក្ស ដើម្បីអភិវឌ្ឍ និងអភិវឌ្ឍលើមូលដ្ឋានអភិរក្សប្រកបដោយនិរន្តភាព» សំដៅអភិរក្សអត្តសញ្ញាណជាតិ និងប្រែក្លាយវិស័យវប្បធម៌ ទៅជាកត្តារួមចំណែកជំរុញកំណើនសេដ្ឋកិច្ចជាតិ។
ជាមួយនឹងកិច្ចខិតខំប្រឹងប្រែងនេះ យើងក៏នៅជួបបញ្ហាប្រឈមជាច្រើនទៀតដែលទាមទារឲ្យយើងត្រូវរួមគ្នាដោះស្រាយដើម្បីធានានូវនិរន្តរភាពនៃវប្បធម៌របស់ជាតិយើង។
លោកជំទាវ ឧបនាយករដ្ឋមន្ត្រី ប្រចាំការ សូមអំពាវនាវដល់បងប្អូន ប្រជាពលរដ្ឋទាំងនៅ ក្នុង និងក្រៅប្រទេស និងគ្រប់ក្រសួង ស្ថាប័នពាក់ព័ន្ធ អាជ្ញាធរដែនដីត្រូវរួមគ្នាជាធ្លុងមួយសំដៅធ្វើឲ្យបេតិកភណ្ឌវប្បធម៌ជាតិទទួលបាននូវសុវត្ថិភាព និង និរន្តភាពតាមរយៈការបន្តយកចិត្តទុកដាក់ឲ្យកាន់តែសកម្មថែមទៀតក្នុងការថែរក្សា ការពារ សិក្សាស្រាវជ្រាវ អប់រំបណ្តុះបណ្តាលផ្សព្វផ្សាយ បង្កើតស្នាដៃ និងផ្ទេរចំណេះដឹងបន្តវេន សំដៅបណ្តុះស្មារតីស្រឡាញ់វប្បធម៌ជាតិ ស្នេហាមាតុភូមិ និងរួមគ្នាលើកកម្ពស់សីលធម៌សង្គម និងសីលធម៌ដ៏ថ្លៃថ្លារបស់ជាតិ ដែលជាស្នូលនៃកិច្ចការធានាសុវត្ថិភាព និងការរក្សាបាននូវនិរន្តភាពវប្បធម៌ ពោលគឺ «យើងទាំងអស់គ្នាដើម្បីការការពារវប្បធម៌ជាតិ ហើយវប្បធម៌ជាតិ ដើម្បីទាំងអស់គ្នា»។ ជាមួយគ្នានេះយើងក៏ត្រូវលើកតម្កើងពហុភាពនៃវប្បធម៌ ដែលជាមូលដ្ឋានគ្រឹះនៃវប្បធម៌ចម្រុះ និងជាការរួមចំណែកលើកស្ទួយនិរន្តភាព លើវិស័យវប្បធម៌របស់ជាតិយើង ដើម្បីធានានូវកិច្ចអភិវឌ្ឍប្រកបដោយចីរភាព។
លោកជំទាវ ឧបនាយករដ្ឋមន្ត្រីប្រចាំការ សូមឧទ្ទិសឲ្យ ទិវាវប្បធម៌ជាតិ ៣ មីនា លើកទី១៤ នេះក្លាយជាថ្ងៃរំលឹកដល់គុណូបការៈបុព្វបុរស និងដូនតាខ្មែរយើងដែលបានបន្សល់ទុកនូវកេរដំណែលសម្បត្តិវប្បធម៌ជាតិរហូតដល់ធ្វើឲ្យកម្ពុជាក្លាយទៅជា ព្រះរាជាណាចក្រ នៃវប្បធម៌។ និង សូមឲ្យ ទិវាវប្បធម៌ជាតិ ៣ មីនា លើកទី១៤ នេះក្លាយជាថ្ងៃដែលយើងត្រួវចងចាំទាំងអស់គ្នា និងចូលរួមប្រតិបត្តិឲ្យបាន ខ្ជាប់ខ្ជួន ថែរក្សា ការពារបេតិកភណ្ឌវប្បធម៌ជាតិ ឲ្យគង់វង្សប្រកបដោយនិរន្តភាព៕